Latest News
Showing posts with label बिहार. Show all posts
Showing posts with label बिहार. Show all posts

Saturday, July 13, 2019

21वीं सदीक भारत, अजुका भारत, नवका भारत,चाँद आ सुरुज पर ज्ञान बघार' बला भारत एखनहु जाति पाति रँग भेद हिन्दू (अवर्ण स्वर्ण) मुसलमान ( सिया-सुन्नी) लिंग भेद आदि सँ आगू नहि बढ़ि सकल अछि।

मकड़जालमे फँसल मकड़ी जकाँ दिनानुदिन लोक ओझराएले जाए रहल अछि। वर्ण जाति धर्म लिंग आदिक लSक जतेक द्विस्थिति मतलब द्विविधामे लोक अजुका भारतमे जिबि रहल अछि साइते पूरा दुनियामे लोक जिवैत हएत।

दुनियाक सभटा देश रोजी रोटी शिक्षा सुरक्षा स्वास्थ्य सेवा पर केंद्रित कार्यक्रम बनबैत आ ओहिसँ जनजन केर लाभान्वित करबाक प्रयास करैत अछि मुदा हमर भारत ओझराएल अछि आजादी सँ लSक एखन धरि गाय गोबर मंदिर मस्जिद मुल्ला पण्डित दलित स्वर्ण मुसलमान हिन्दू तुष्टिकरण करबामे। तेँ देशक हालात जकथक पड़ल विकासक नाम पर कागजमे मिलिखा सिंह आ जमीन पर लुलहा नेंगड़ा बनल घुसकुनिया काटि रहल अछि।

भरिसक भारत चाँद सुरुज आ ताहू सँ आगू जँ किछु होय ओतय पहुँच जाए मुदा एखन धरि अपनहि अगल बगलक समाजमे पसरल भ्रामकता सँ अनभिज्ञ आ अज्ञानी बनल अछि। स्त्री आ पुरुषकेँ  कहबाक लेल एक दोसरक पूरक मानैत अछि मुदा असलियत दुनूकेँ बीच एखनहुँ जमीन आ आसमानक फराक बनल अछि। एखनहुँ देशक 50,प्रतिशत संख्याक गौरव प्राप्त करय बाली स्त्रीकेँ मनोदशा बुझबामे देश असमर्थ  अछि।

स्त्री आ पुरुखकेँ जीवन रूपी गाड़ीक दुनू पहिया अछि, तखन दुनु पहिया पर समान रूपसँ दृष्टिपात होयबाक चाहि आ से केवल पोथीक पन्नामे नहि यथार्थमे तखनहि विकासक पहिया निर्वाध दौड़ सकत। मुदा दुर्भाग्य एखनहु ई समाज स्त्रीकेँ दोसर दर्जाक इंसान मानि ओकर वेदना संवेदना स्वाभिमानक सँग अपन पुरुखवादी अहं सँ ओकर मनःस्थितिकेँ उपेक्षा करैत अपन वर्चस्व स्थापित कS ओकरा दास बनएबाक प्रयास करैत छथि।
अहिना किछु मनोभाव, एखन बस एतबे
जयमिथिला जयमैथिली जयजय मिथिलाक्षर

Tuesday, July 2, 2019

||★|| एक आओर महाभारत ||★||

महाभारत युद्धकेँ कसूरवार
फुसीएकेँ लोक मढ़ैत छैक
दुर्योधन दुशासन द्रोपदी आ
शकुनिक कपार पर।

असलमे एकर सूत्रधार कियो आओर नहि
अपितु स्वयं धृतराष्ट्र छथि
जनिकर बिआह जबरन
अस्त्र शस्त्र सँगहि सहस्त्र दल बलसँ
गांधारी सँग कराओल गेल रहनि।

जन्मांध धृतराष्ट्रक कारणसँ
गांधारी अछैत आँखि
जीवनपर्यंत आँखि पर पट्टी बान्हि
एक दोसरक सँग जीवन
निर्वाह करबाक प्रण कएलीह।

सहोदर होयबाक कारणे
ई घटना शकुनीक
अन्तर्मनकेँ झकझोरि देने रहनि
उद्विग्न अन्तर्मनक रोस ओकरा
प्रतिशोधक बाट पकड़बाक लेल
उद्वेलित कए देने रहनि।

पजरैत प्रतिशोधक आगि मिझएबाक लेल
बिसरि गेलाह अपन बहिन बहिनोईकेँ
फेकैत रहलाह षडयंत्रक जाल
चलैत रहलाह मनमाफिक चाल
जा धरि महाभारत युद्ध शुरू कS
अपन बदला नहि लS लेलक।

अहि इंद्रप्रस्थ केर धरती पर
संस्थाकेँ स्वरोजगारक साधन समझि
सगे समन्धित सहित कुंडली मारि बैसल
जन्मांध मानसिक अपंग मठाधीस सभक
आँखि पर बान्हल स्वार्थक पट्टी खोलबाक लेल
एक आओर महाभारतक बेगरता अछि।

हाड़ मांसक मनुक्ख होयतहुँ
अहाँक वेदना संवेदना अहाँकेँ सँग छोड़ि देल अछि
गांधारीक पट्टी बान्हब
ओकर पतिधर्म निर्वहन हेतु पाप नहि कहाओत मुदा
अहाँक आँखि पर बान्हल पट्टी
इतिहासमे अवश्य पोल पट्टी खोलत।

अन्याय अनीति कुरीतिकेँ खिलाप
बहीर अकान बनि मूकदर्शक बनि
किएक आ कहिआ धरि सर समाज
संगहि सँग देशक दुर्गति होयत देखैत रहब।

जयमिथिला || जयमैथिली || जयजय मिथिलाक्षर
रामबाबू सिंह मिथिला
०३.०७.२०१९

Saturday, June 29, 2019

जहियासँ सुप्पत आ सार्थक गप्प बजबाक रोग लागल तहियासँ अनेरे अघोरी सभक आँखिक कीड़ा बनि गेलहुँ। अघोरी अहि द्वारे कहलहुँ की हुनका सभमे समाजिक वा सरोकारी काजक कोनो दृष्टि नहि छनि ओ सब केवल अप्पन स्वार्थ सिद्धि लेल अफसियांत देखल जाएत छथि। आ जखनहि किछु अँखिगर गप्प कए झाँपल चीज उघार केलियैन्ह की छ'क दए लागि जाएत छनि। आ फेर ओ सब अपन पोसुआ कुकुड़ बिलायकेँ आदेश दए झाऊँ झाऊँ करा सार्थक विषय वस्तुक धाराकेँ एनकेन प्रकारेण अपना दिसि मोड़बाक कुप्रयास करय लागैत छथि।

सत्तसँ परिचित रहितहुँ ओ उठाओल गेल उचित सबालकें अनुचित मानि हमरे विपथगामी सिद्ध करबाक कुचेष्टा करैत छथि। भरिसक ओ हमरा गलत बुझैत होय मुदा हमरा नजरिमे ओ गलत नहि छथि। समय बलवान होयत छै, नीक आ बेजाए ओ स्वयं सिद्ध भए जाएत। सोझामे होयत देखि अनीति अकर्मण्यता अक्षमता अनुशाशनहीनता पर हम बहीर अकान जकाँ चुप कोना रहि जाउ। संस्था आ संगठनक सृजन समाजिक उत्थान लेल कएल जाएत अछि तखन ओकर जिम्मेबारी समस्त समाजकेँ सेहो होयत छैक। नीक आ बेजाए पर ओ साधिकार सबाल उठा सकैए। संस्था मतलब कोनो वा किनको प्रोपराइटरशिप कम्पनी नहि जे अपना महींसकेँ कुरहरिसँ नाथत आ लोक नाथ' देतनि।

अजगुत लगैए जखन कोनो संस्थाक अनियमितता पर सबाल उठैत अछि तँ श्रद्धा विसवास उमेर नव पुरानक लटका झटका दए सबाल पर उनटा सबाल दागि सबालकें श्राद्ध करबाक कुप्रयास करैत छथि।  मुदा सुनगैत सबाल तँ सुनगैत सुनगैत चिनगी आ फेर पजरि कS धधरा रूप अख्तियार करबे करत। कियो चाहे कतबो ओकरा झाँपन तोपन करबाक प्रयास करबै मुदा अहि पर नियंत्रित करब असंभव रहत।

खैर दोसरकेँ मनोभाव हमरा प्रति अनुकूल हो वा प्रतिकूल हमरा नहि फरक पड़ैए। किएक तँ हम जनैत छी जँ कोनो सार्थक आ नीक काज लेल हम किनको लेल खराप आ किनको लेल नीक भए सकैत छी।मुदा हमरा लेल संतोषजनक गप्प जे वास्तविकता छै, ओ सभक सोझा अबैए। स्वामी विवेकानंद जीक एकटा बात मन पड़ैत अछि " सभटा नीक बातकेँ पहिने मजाक बनैत अछि आ फेर ओकर विरोध कएल जाएत अछि आ तकर बाद ओकरा स्विकारल जाएत अछि। तेँ भरोसा अछि सत्यकेँ विजयी होयत एकदिन अवश्य देखब ताहि मंगलकामनाक साथ सब गोटेंकेँ हमर प्रणाम।
प्रतिक्रियाक प्रतीक्षारत।
जयमिथिला || जयमैथिली जयजय || जयजय मिथिलाक्षर ||

Wednesday, June 26, 2019

सगरो देशमे सरकारी अस्पतालक स्वास्थ सेवाक हाल अनेरुआ गेS महिंस सँ सेहो गेल गुजरल भए चुकल अछि। तकतियान करय बला कियो कतहु नहि ? नेराएल नार पुआर खायत, नेंगरायत मारल झमारल कतहु कोनो बाट घाट करोट भेल पड़ल जीवन आ मृत्यु सँ स्वयं संघर्ष करैत भेटैत अछि।

आब जखन अस्पताल अपने आईसीयू मे पड़ल होय तखन रोगीकेँ तँ भगवाने मालिक। ओहुना सरकारी अस्पताल पर भरोसा फटेहाल गरीब दुखियाक बेसी होयत छैक, एकर कारण आ कारण केवल गरीबी । आ जे कनिओ सामर्थवान होयत अछि ओ सरकारी अस्पतालमे मरय लेल नहि जाए चाहैत अछि। गरीब दुखियाक सुधि लेनिहार कियो नहि, खाली वोटक समय सब मन पाड़ल जाएत अछि फेर स्वार्थ सिद्ध भेलाक बाद यादास्त चलि जाएत छनि।

आमजनकेँ सरकारी अस्पताल पर अतेक नाभरोस किएक अछि? अहि सबाल पर व्यापक विमर्शकेँ आवश्यकता अछि तथापि किछु महत्वपूर्ण विंदु हम एतय अवश्य राखय चाहब:-
प्रथमतः सरकारकेँ निजी अस्पतालकेँ संरक्षण आ संवर्धन पर जोर देब आ ताहिमे अप्पन भविष्य ताकब। केवल नेता आ बाबू सभक भ्रष्ट आचरण केर कारण अपने हाथ सँ सरकारी अस्पतालकेँ नहुए नहुए जानि बुझि कS आईसीयू मे पहुंचा देल अछि जाहिसँ निजी अस्पताल चमकैत रहय आ संगहि सँग चमकैत रहय अप्पन जेबी।

नीति आयोग केर स्वास्थ्य सेवाक वार्षिक रिपोर्ट वास्तवमे सरकारी स्वास्थ्य व्यवस्थाक पोल खोलि देल अछि। एकतरफ वामपंथी राज्य केरल जे लगातार स्वास्थ्य सेवाक क्षेत्रमे देशमे टॉप स्थान पर काएम अछि तँ दोसर दिसि सभसँ अंतिम स्थान 21 नम्बर पर बाबा जीक उत्तर प्रदेश जे 2015-16 ,केS बाद आओरो बदतर भS गेल अछि। रिपोर्ट प्रकाशित करनिहार संस्थाक अध्यक्ष स्वयं प्रधानमंत्री छथि।  20 नम्बर पर बिहार आ 19 नम्बर पर उड़ीसा रहल अछि। स्वास्थ्य सेवा बदहाली अतेक भयाबह होयतहुँ नेता जी निश्चिंत छथि। कतहु ऑक्सीजन केर अभावमे जनमौटी बच्चा दम तोड़ि रहल छैक तँ कतहु डॉक्टर दवाई आ अस्पतालक अभावमे चुट्टी पिपहि जकाँ मरि रहल अछि।

एकर निदान संभव छैक मुदा समस्या जानि बुझि कS कश्मीर समस्या जकाँ जटिल बनाकS रखने अछि। जाति पाति अगड़ा पिछड़ा गरीबहा धनिकाहा आदि सभ सूत्र बनाबयमे सालों भरि माथ भिडबैत रहैत छथि मुदा स्वास्थ्य सेवा जे लोकक अधिकार छै ताहि दिसि कोनो निस्सन डेग नहि उठाओल जाएत अछि। कनि सोचू

जयमिथिला || जयमैथिली || जयजय मिथिलाक्षर

Thursday, June 20, 2019

एकटा समृद्धशाली शक्तिशाली देशक संरचनामे एकएक टा राज्यक भूमिका अहम मानल जाएत अछि। देश कोनो एक व्यक्ति समूहक नाम नहि एकर निर्माण छोट छोट प्रदेशकेँ जोड़ि कS होयत अछि। स्वस्थ प्रदेश बिना स्वस्थ देशक परिकल्पना ठीक तहिना जेना स्वस्थ अंग बिना देहक परिकल्पना अछि।रोगग्रस्त अंग सँ निरोगी कायाक कल्पना करब मूर्खता अछि।

दुर्भाग्यक गप्प जे प्रदेशमे देशक भविष्य तड़पि तड़पि कS दम तोड़ि रहल अछि आ देश आ प्रदेशक मुखिया अलमस्त अपन अपन दुनियामे व्यस्त अछि। योग दिवसक धमगज्जरि सगरो दिसि मचल अछि। जेकरा योगक "यो" नहि बुझल सेहो आजुक दिन योग पर प्रवचन दैत भेट जाएत। योग सँ देश निरोग बनय से किएक नहि कियो चाहत मुदा केवल देखाबटी लेल देशक करोड़ो रुपैया एकदिनमे फुकि देब बताहपन अछि। सालमे एक दिनक योगक घुट्टी देलासँ जँ देश निरोग भए जाए तँ एहन हसीन सपना देखनिहारकेँ हमर कोटिशः नमन अछि।

हमर मन मुज्जफरपुरमे राजीनीति घिचाघिचि सँ भए रहल सामूहिक बाल हत्या पर बेकल अछि। एहन आपातकाल परिस्थितिमे डिजिटल इंडियाक डिजिटल मुखियाकेँ मौन धारण करब अन्तर्मनकेँ झकझोरि रहल अछि। जँ ई घटना गुजरातमे भेल रहितैक की तखनो साहेब अहिना चुप्प रहतथि? कदापि नहि।

मुदा डपोरशंखी सब ई कहैत भेट जाएत जे साहब मनेमन गहन चिंतन मनन कS कोनो पैघ योजना बना रहल छथि कनि थमहु फेर देखबैन्हि! हौ वंश कुरिहरि तोरे सब सनक लोकक अंतर्मनकेँ पढ़िकS फकरा बनाएल गेल हेतैक जे "रहा न कुल में रोबनहारा"।

समस्त देशवासीकेँ निरोग होयबाक शुभकामना सँग योग दिवस पर असमय काल कल्पित भेल तमाम नौनिहालकेँ अश्रुपूर्ण श्रधांजलि😢😢

Sunday, June 16, 2019

की हम फूसि बजैत छी
रावण आ कंश सनक कुसंस्कारी अहंकारी
अपन वर्चस्व काएम करबा लेल केवल
आमजनक अंतर्भावकेँ ठेंगा पर राखि
सत्ताक भोग विलास आ विस्तार लेल
सदैव भाँटा मुरई जकाँ छकरैत रहल अछि।

दास आ खबासक कोन चॉइस
स्वाभिमानकेँ अपनहिसँ पहिने श्राद्ध करैछ आ
अपन आराध्यकेँ चालि चरित्र चेहरा जनितहुँ
विचारशून्य भेल व्याधिग्रस्त बुधिसँ
चारु पहर झालि मृदंग सँग कीर्तन कए
अरदासमे अन्हराएल बेसुध भेल
बिसरि चुकल अछि अप्पन वॉइस।

मायावीक मोहपाशमे जकड़ल मनोरोगी
मुदित अछि देशक सँग मसखरीमे
देशक दुर्भाग्य जे हत्या ब्लात्कार आ अप्राकृतिक मृत्युसँ
हाक्रोस करैत अछि यूपी बिहारक लोक
आ बताह जकाँ भनभनाएयत भकचोंहर सब
सिटी ऑफ जॉय नाम सँ प्रसिद्ध क्लकत्ताकें
सिटी ऑफ सॉरो बनएबाक तैयारी कS रहल अछि।

श्मशानक अड्डा बनल अछि बिहारक मुज्जफरपुर
जतय एक एक कS सुन्न कए रहल अछि मायक गोद
ताहि सँग सुन्न देखल जा रहल अछि सत्ताधारिक संवेदना
अस्पताल जरूर ठाड़ छैक मुदा डॉक्टर आ दवाई लापता
भविष्यक कतेको अभिनंदन
रोगग्रस्त सरकारी व्यवस्थाक सिकार भए दम तोड देलक
आ एखनहु लगातार तोड़ि रहल अछि।

#सेव_चाइल्ड
रामबाबू सिंह मिथिला
१६.०६.२०१९

Friday, June 7, 2019

आउ आई मौसम आ राजनीतिक तपीस सँ इतर किछु स्वास्थ्यवर्धक चर्च करैत छी, जकर विषय अछि दैनिक जीवनमे सर्वोपयोगी उजरका चीनी।
मिथिलाक सर्वोत्कृष्ट "फ़ास्ट फ़ूड" दही चूड़ा चीनीकेँ मानल जायत अछि। भोरेभोर फटाफट सात्विक भोजन हेतु अहिसँ उत्तम कोनो आहार नहि। दही चुरा चीनी पर त' कतेको पोथी सेहो हिट भS चुकल अछि। मुदा चीनीक सेवन सँ भए रहल शारीरिक नोकसान पर एतय हम विस्तृत जानकारी राखय चाहब, आशा अछि जीवनोपयोगी सिद्ध हएत।

पहिने लोक चीनीकेँ प्रयोग भोजनमे नहि करैत छलाह। ओहि स्थान पर मिठगर फल वा मिठगर खाद्य पदार्थकेँ उचित मात्रामे सेवन कS पूर्ति कS लैत छलाह, जाहि सँ पुरान लोक दीर्घायु आ जीवनपर्यन्त काज करबामे सक्षम रहैत छलाह। एखन लोकक मनमे भ्रान्ति पैसल छनि कि चीनीक सेवन सभ्य लोकक निसानी आ गुड़,शिरा, बुरा आदि सस्ता शर्करायुक्त खाद्य पदार्थ गरीबक कथा पिहानी अछि। तेँ आई काल्हि बड़का बड़का घरमे मधुमेह रोगी बहुतायत पाओल जाएत अछि।

चीनीमे पोषक तत्व नहि होयत अछि उनटा ओकरा पचएबामे शरीरक ऊर्जा बेसी खरच' कएलासँ शरीरकेँ नोकसाने होयत अछि। चीनीक सेवनसँ इन्सुलिन बनाबय बाला ग्रन्थिकेँ प्रभावित सेहो होयत अछि, फलस्वरूप मधुमेह रोगक सिकार भS जएत अछि।

शरीरमे उर्जाक लेल कार्बोहाइड्रेटमे शर्कराकेँ बेस योगदान होयत अछि मुदा एकर अर्थ ई नहि कि रासायनिक प्रक्रियाकेँ बाद छांटल बनाओल गेल परिष्कृत चीनी मात्र उपयोग कएल जाए। ई चीनी एकटा नहुँ-नहुँ आ मिठगर जहर ( Slow as White Poison ) जेकाँ शरीर पर काज करैत अछि।जे कियो गुड़ छोड़ि चीनी सेवन कS रहल अछि हुनकर स्वास्थ्यमे सेहो निरंतर गिराबट देखल जाएत अछि एहन एकटा सर्वेक्षण रिपोर्ट अछि।

ब्रिटेन केर प्रोफेसर ज्होन यूडकिन चीनीकेँ श्वेत जहर कहैत छथि। शारीरिक शक्तिक दृष्टिकोण सँ चीनीक कोनो आवश्यकता नहि, से ओ सिद्ध कएने छथि। दूध, फल, अनाज सभक उपयोग कएला सँ शरीरकेँ जरूरत चीनी ग्रहण कS लैत अछि आ ओतेबा पर्याप्त अछि। किछु लोक चीनीकेँ त्वरित शक्तिक साधन सेहो मानैत अछि जे मात्र भ्रमजनित मान्यता अछि, वास्तविकता सँ कोनो लेना देना नहि। चीनीमे मात्र मिठास छैक आओर विटामिन केर दृष्टि सँ एकदम बेकार।

चीनीक सेवन सँ रक्तमे कोलेस्टोरेल बढैत अछि जाहि सँ रक्तवाहिनी केर देवाल मोटगर भS जएत अछि, ताहिसँ रक्तदबाब आ ह्रदय रोगक समस्या सेहो होयत अछि। एकटा जापानी डॉ 20 देशमे खोजिकय जानकारी देलक कि दक्षिण अफ्रीकाक हब्शी लोक, मसाई आ सुम्बरू जातिमे ह्रदय रोगक नामो निशान नहि होयतअछि कारण ई सब चीनी अपन खाद्य पदार्थमे बिलकुल प्रयोग नहि करैत अछि।  चीनीकेँ बेसी सेवन सँ हाइपोग्लुकेमिया नामक रोग होयत अछि जाहि सँ शरीरमे कमजोरी, झूठ सनक भूख , रोगी कखनो काँपि कS बेहोस भS जएत अछि।

चीनीकेँ पचबैत काल एकटा एसिड जनमैत अछि जाहि सँ पेट  आओर अँतड़ीमे जलन करैत अछि। चीनी खाए बाला बच्चाकेँ  दाँतकेँ नोकसान पहुचाबैत अछि। चमड़ी रोग सेहो चीनीकेँ कारण होयत अछि। अमेरिका के डॉ हेनिंग़ट शोध कएलाह कि चॉकलेटमे निहित टायरामीन नामक पदार्थ सिरदर्द केS कारण बनैत अछि। चीनी आ चॉकलेट अध्कपारिक दर्दकेँ कारण सेहो बनैत अछि।

अतः बच्चा सभकेँ  पिपरमेंट गोली, चॉकलेट आदि मिठगर पदार्थ सँ दुरे राखक चाही। अमेरिकामे 98% बच्चा दाँतक रोगी अछि, कारण चीनी आ चीनी सँ बनल पदार्थ अछि। चीनी केर चमकएबाक लेल  वा उज्जर धप-धप बनएबाक लेल चुना, कार्बन डाईऑक्साइड, कैल्शियम,फ़ॉस्फ़ेट,फॉस्फोरिक एसिड, अल्ट्रामरिन ब्लू आ जानवरक हड्डी के चूर्ण सेहो उपयोग कएल जएत अछि। चीनीकेँ अतेक गरम करैत अछि कि समाहित प्रोटीन नाश भ जायत अछि। अमृत ओहिमे सँ बिला जाइछ आर विष बनि उज्जर चीनी रहि जायत अछि।

उजरका चीनी ललका मिरचाइ सँ बेसी खतरनाक अछि। अहि कारण सँ वीर्य पानि जेकाँ पातर भS स्वप्न दोष, रक्त दबाब, प्रमेह आर मूत्रविकार केS जनम दैत अछि।वीर्यदोष ग्रसित पुरुष आओर प्रदररोग ग्रसित स्त्रीगण चीनीकेँ तेजि देलाह सँ अदभुद लाभ उठा सकैत अछि। डॉ सुरेन्द्र प्रसाद@"भोजनमे बिनु चीनी छोड़ने दाँतक रोगी कहियौ स्वस्थ नहि भS सकैए।

Saturday, May 18, 2019

"कामकें नहि काजकेँ आ दुश्मन अनाजकेँ" वर्तमान परिदृश्यमे  ई कहबी एकदम सटीक बैसैत अछि। बात फेकबा लीय बड़का सँ बड़का फेकू हिनका सभ लग पानि भरत। एखन नवका नवका उगल जट्टा बला तथाकथित राष्ट्रवादी सभक राग उपराग अलगे भेटत। आब हिनका सभके महात्मा गांधीकेँ राष्ट्रपिताक उपाधि सँ पेटमे मरोड़ आबि रहल छनि। एहन कुतर्की गैंग, देश त' छोड़ू विदेशोमे भेटब मोसकिले अछि। जानि नहि माथमे कोन घुरघुरा घुसल छनि से जखन महिंस शर्मा अपन घरक देवी माता सीताकेँ टेस्ट ट्यूब बेबी सँग हुनक अस्तित्व पर सबाल ठाड़ कएने रहनि तखन त' कल्ला नहि अलगलनि, मुदा गांधीकेँ राष्ट्रपिता नेहरूकें चाचा पटेलके सरदार आदि किएक आ कहिआ सँ कहब शुरू भेल आ किएक भेल ताहिकेर प्रमाण ताक'मे सुखाएल जा रहल अछि।

अज्ञानताक आकासमे उड़ि रहल उकाठी सभक उलूल जुलूल बातसँ समाजिक समरसता सेहो खण्डित विखण्डित भए रहल अछि। अहिसँ हिनक नाकारत्मक मानसिकता सेहो उजियार होयत छनि। महात्मा गांधीकेँ बापू मानबाक कोनो कानूनी बाध्यता त' नहि अछि, जे नहि मानबैक त' सीबीआई पकरिकS चुरी कसि देत। पेटमे मरोड़ अछि त' दवाईक सेवन करू, अकारण जतय ततय घिनएबाक प्रयास कएला सँ की लाभ!

अहाँ सनक किछु आन्हर लोकसँ किछु नहि फर्क पड़ैत छैक , आई समस्त विश्व गांधी जीकेँ बापू कहि गौरवान्वित होयत अछि। अहाँ सब बापुकें हत्यारा आतंकी गोडसे केS अपन बापू मानि लीय संगहि सँग प्रज्ञा ठाकुरकेँ राष्ट्रमाता, कियो की रोकि रहल अछि। आ से मानैते हएब कारण अहाँ सनक लोकक आदर्श यएह प्रजाति रहल अछि।

कुरी कुरीमे छिड़िआयल अपन घरक लोककेँ कोना एकठाम ढेरीआओल जाए तकरा लेल कोनो प्रयास नहि, जाति पाति अगड़ा पिछड़ामे समाज सूखा कS पात विहीन नग्न गाछ बनि चुकल अछि से कोना हरिआएल जाए, ताहिलेल बुधि हेरायल अछि। कोना बेसी सँ बेसी अपन समाजक लोककेँ देशक महापंचायतमे स्थान भेटैक तकर सोच निपत्ता अछि, खाली बकलोली करैत रहब बापू चाचा सरदार नमो चाणक्य फ्ललां चिल्ला आ जिनगी भरि दोसरकेँ झोरा उघैत कतहु ओंघराइत पेट पोसैत रहब।

स्वाभिमानके श्रधांजलि दए चुकल कुतर्की गैंग सभक कुतर्कक कारण मिथिला शिथिला बनिकS रहि गेल अछि। मिथिला केवल आब प्रपंची लोकक झोरामे समाएल अपन अस्तित्व लेल झखि रहल अछि। मनोयोग लेल जानल जाएत छल से आब मनोरोग सँ पाटल अछि।

अहाँक जन्मे भेल अछि दोसरक बियाह दान पावनि त्योहारमे नांचि गाबि कS थोपड़ी पिट्य लेल जेना की समाजमे तेसर प्रजातिक होयत छैक। करोड़ो जनसंख्या बला क्षेत्रक ई बदहाल केवल आ केवल शारीरिक आ मानसिक नपुंसकता कारण अछि। अहिना किछु फुरा गेल, ओना लिखबहक त' बहुत किछु अछि मुदा आब बस, फेर कहिओ

जयमिथिला || जयमैथिली || जयजय मिथिलाक्षर

Thursday, May 9, 2019

पाँच सालक कार्यकालमे साहेब जँ
सेखी बघारब आ केवल अपन सौख पुरेबाक सनकमे
दुनियाक चक्कर लगेबाक धनचक्करमें नहि पड़ि
संकल्पित काजक प्रति निष्ठावान रहितथि
त' आई कल बल छल आ प्रपंची प्रतिभासँ पूर
सदीक महान नाकारात्मकताक प्रतिमूर्ति बनि
अपन देश कोसक चुनावी चौक चौराहा पर
अतेक बोमिआए नहि पड़तनि।

लहास देखि जेना गिद्ध अकासमे बिनु आमंत्रण
अनायास उगि अबैत अछि आ
अपन झुण्ड बना गीत नृत्यक कलाबाजी सँग
उत्सव मनबैत पेटक क्षुधा मेटा तिरपित होयत अछि
ठीक तहिना आजुक राजनेता सब
कतहु अगराही लागि जाउ
आ की दंगा फसादमे घरक घर तबाह भए जाउ
चाहे नार पुआर जकाँ खेत खरिहानमे लहासक ढेर लागि जाउ
वा देशक वीर सेनाक शहादत किएक नहि भए जाउ
मुदा हिनका सभलेल कोनो उत्सवसँ कमतर नहि।

गिद्ध त' नेता सभसँ लाख गुना नीक कारण
ओ शिकारी सँग मुर्दाखोरी लेल जानल जाएत अछि
वातावरणके स्वच्छ राखय लेल ओ सब सेल्फी नहि
अपन कर्मकेँ धर्म बुझि अंतिम परिणाम धरि लागल रहैत अछि
मुदा नेता नहि त' शिकारी आ नहि मुर्दाखोर होयत अछि
लेकिन एहन धूर्त प्रजाति जे सेवाभाव सँग राष्ट्रनिर्माणक
संकल्प लS सत्ता पर आसीन होयत छथि आ देशक दुर्भाग्य जे
फेर गिरगिट जकाँ रँग बदलैत निज स्वार्थ पूर्ति हेतु आ
स्वनिर्माण लेल सगर समाजमे अकानल जाएत छथि।

जयमिथिला || जयमैथिली || जयजय मिथिलाक्षर ||

Thursday, April 25, 2019

अजुका भारतक नेता अपन कार्य स्थल घर दलानमे
प्रेरणात्मक फोटू भले टँगने रहैत अछि
अपन अपन विचारधारानुकुल
नेहरू गांधी पटेल शास्त्री आदि महान व्यक्तित्वक
परञ्च हाव भाव स्वभाव आ सँस्कारमे
कुकुड़पनक प्रभाव बेस देखल जाएत अछि।

एक दोसरक पर्यायवाची आ दुनु अवसरवादी
अपन पेटक जोगार वा निज स्वार्थपूर्ति हेतु
ओ जनैत अछि
कखन द्वारे द्वारि नांगड़ि डोलएबाक अछि
आ कखन वर्चस्व स्थापित हेतु भौंक कS डेरएबाक अछि
आ पेट भरि गेलाक बाद कखन ओकरे पर हमलावर भए
काटि खएबाक अछि।

दुनु अपन अपन सीमानमे
एक दोसरकेँ फुटली आँखि नहि सोहायत अछि
शेरक कोनो सीमान नहि मुदा कुकुड़क सीमान निर्धारित होइछ
तेँ दोसरकेँ अपन सीमान दिसि देखितहि एक दोसर पर
भौंकब शुरू कS दैत अछि
आ फेर कुकुड़क झुण्ड बना घात-प्रतिघात कS
सीमा विस्तार हेतु
खूनी खेल धरि रचैत अछि, खेलैत अछि।

नेता आ कुत्ताकेँ लSक
मनुक्खक बीच आब कोनो द्वन्द्व नहि रहि गेल अछि
कुकुड़ अजुका भारतमे नेतासँ बेसी सम्मानित अछि
एकबेर कुत्ताकेँ घरक चौकीदार मानि निचेन भS सकैत अछि
परञ्च नेताक प्रजाति पर किन्नहुँ नहि
सीमा विस्तार हेतु स्वयं विष्ठापान आ
दोसरकेँ विषपान सेहो करा सकैए।

जयमिथिला || जयमैथिली || जयजय मिथिलाक्षर ||
२५.०४.२०१९

Sunday, April 21, 2019

असँख्य योजनासँ अघाएल
पंचवर्षीय खद्दरधारी भीखमंगाक अहि देशमे
समाजक इंद्रधनुषी व्यवस्थाक रँगकेँ
बेसुरा राग भासक तरुआरिसँ तहश-नहश कS 
राकस सब एकाधिकार निरंकुशताक नांगड़ि पकड़ि
अपँग बनएबाक प्रयासरत अछि।

राम कृष्ण आ बुद्धक भारत
ईशा मसीह आ नानकक भारत
वेद आ पुराणक भारत गीता आ कुराणक भारत
शुद्ध सुधायुक्त सुरमयी भारत
आब बदलिकS बनि गेल अछि नवका भारत
ई सतरंगा नहि एकरँगा भारत, बदरंगा भारत
जाहि भारतमे उद्योगपतिक तरमे मस्त अछि सरकार
पसरल छैक सगरो भूख भय आ भ्रष्टाचार
आमलोक सब अछि लाचार जतय चोर बनल अछि चौकीदार

अजुका भारत, नवका भारत
उड़ीसाक कालाहांडीक दानामांझी बला भारत
गरीब दुखिया जन मजूर बेरोजगार मजबूर
ओकर फाटल जेबी सँग फुटल ओकर भाग्य
अन्न पानि बिना दिनानुदिनसँ उपास पड़ल चूल्ही
निशक्त भेल देहसँ विमार धर्मपत्नीकेँ
आ सरकारी अस्पतालमे पाय कौड़ीक अभावमे
अकाल मृत्युसँ नहि बचा पौलक।

खून खौल जाएत अछि स्मृतिमे अबितहि ओ दृश्य
जखन दानामांझी अपन मुइल धर्मपत्नीक लहासकेँ
फाटल चिटल गुदरीसँ घास-फूस जकाँ गेठरी बान्हि
अपन कन्हा पर लादि
दस किलोमीटर धरि पैदल चलैत अछि मुदा
तखनो दानामांझीकेँ खून नहि खौलैत अछि कारण
ओ एकरा अपन नियति मानि चुकल अछि

दस किलोमीटर धरि पैदल  लहास लS उठैत बसैत
माथ पीटैत, दहोबहो कानैत अपन दुर्भाग्य पर
मुदा ई लहास कन्हा पर केवल दानामांझीक धर्मपत्नीकेँ नहि
ई लहास छल लोकतंत्रकेँ, ई लहास छल लोकतंत्रक महापंचायतक, ई लहास छल समाजकेँ संवेदनहीनताकेँ, अजुका भारतक भावनाकेँ, समरसताकेँ।
ई लोकतँत्रक कपार पर लागल एहन दाग अछि जे नवका भारतक सत्तसँ दर्शन करबैत अछि।